潘頓東南亞叉完電復課

冠軍騎師潘頓暑假去咗印尼和泰國等地旅行叉電，昨晨(8.15)終於復課，先與丁冠豪傾咗一輪，再替賀賢馬房「金滙千帥」出大圈快跳，全日只操此駒。

講到暑假行程，潘頓透露一家人先飛去印尼度假，之後飛返香港，因為囡囡Roxy即將升讀中學，所以潘頓帶埋Roxy與囝囝Cash返港，安頓好一對寶貝仔女後，先再與愛妻Nicole飛往泰國過二人世界。潘頓仲話，Nicole擔心航班飛越戰亂嘅中東上空，所以決定打消歐洲旅遊嘅念頭。

金誠剛華麗再勝打韓戰

9月6日韓國兩場G3共有四匹港馬遠征，沈廐「華麗再勝」、文廐「自強不息」及東廐「美麗第一」跑沙地1200米韓國短途錦標，沈廐「浪漫戰神」則跑1800米韓國盃。

「華麗再勝」幕後決定用金誠剛遠征韓國，騎者昨晨復課即為此駒在大圈快試，試罷見沈集成在機坪接馬並密斟一輪，金誠剛全日亦只操過呢匹馬，且看今次攜手征韓能否取得佳績。