雙堯爭輝 勝者為煌

癸未日開鑼，天干癸水坐未土，五行格局係「水被土剋」，財星(火)暗藏於未中，玄大師話是日賽馬宜加持火(紅紫色)、木(青綠色)趨旺財運。
既然要「火」，瑞郎哥立即食住上，要火就要辣，重心第六場，紅袖綵衣「辣得準」啱晒！再整條「老鼠斑」，又係紅袖綵衣，來個水煮魚好和味，你吃唔吃埋一份？
講到旺門生肖，大師話先睇馬、兔、猴。三位肖馬騎師座騎惡、利搶攻：何澤堯晨課已見紅光滿面；田泰安摩拳擦掌尾場「放箭」，連蔡明紹都在泡製「加州」冷品。
大師最睇好何澤堯，佢件「櫻花酒杯」犀利，但熱門難免，想有好賠率要睇第五場「歷勝」！瑞郎哥來料，此馬幕後自視高，上季輸在嫰口，今季可以賺番夠本，長線吼實呢隻！
塔羅小姐上季馬手氣唔錯，世盃又搵到食，開鑼戰當然要佢占一占。佢抽出三張牌：第一張開局牌係「寶劍騎士」(逆位)。第二張牌係「聖杯三」(正位)。第三張牌係「世界」(正位)。投注啟示係初段不宜急躁落大注。
至於三張牌嘅揀馬啟示，靠你靈感。睇見「寶劍騎士」呢張牌，好多人會聯想到「銀刺勇士」等等，塔羅小姐話全日唔少「奇兵」或「將士」，但佢話加埋「世界」同「聖杯」兩張牌，靈感去咗第五場「明德輝煌」，同場撞正瑞郎哥推介嘅「歷勝」，睇吓雙堯火併，邊個笑到最後！