暑期多駒加盟 徐廐駟跑得實鍊

【競馬訊】暑期係馬匹轉倉之高峰期，七月至今便有53駒轉換馬房，當中以新開倉之甘敏斯獲12駒加盟最多，另外，快將年屆66歲退休年齡之徐雨石亦有九駒來投，兵力明顯增強。睇番對上三季開鑼戰例有轉倉初出馬上名，今日兩駒作轉倉後首戰，分別係「駟跑得」及「五福星」，同樣是轉徐廐初出，而且皆有王牌在身，倉主似乎有心要省招牌穩軍心。

頭場「五福星」上季十戰全負，馬季煞科日拉倉轉投徐廐，雖然本身贏泥地，但草地亦曾四次入位，評分創新低，抽四檔有力突擊。另外，第四場「駟跑得」與同系「智跑得」（已退役）、「馭跑得」及「駿跑得」在上季尾先後加盟徐廐，倉主當然希望盡快交成績，「駟跑得」上季尾只以短頭負於其後在四班入Q之「焦點」，九歲馬戰鬥力未退化，老馬搏得就搏。