開季至今Q都冇！ 艾道拿呢期手執多寶

艾道拿上季早在開鑼日便憑「辣得準」開齋，不過今季開季跑咗四次賽事，騎者莫講贏馬，連Q都未入過，騎師榜暫時包緊尾。周三(9.23)谷草夜賽艾道拿策騎幾匹實力馬上陣，睇吓可唔可以破釜沉舟贏馬開齋。第一匹係第三場四班1650米「睿智多寶」，上季出道跑過九仗獲一冠一亞一季，全數皆由艾道拿經手，人馬合拍無需多講。今季初出跑1400米配霍宏聲跑第八，艾道拿同場騎「加州熱浪」，大概都知「睿智多寶」只求熱身，今仗增程跑1650米人馬重新合體，睇嚟有機會助艾道拿開糊。

第二匹係第七場三班1200米「乘數表」，上季贏過谷草同程，最後一場首配艾道拿，後上不及跑第五獲獎金，看馬匹末段衝刺有貨在手，九月中從化回港做足操練，即管睇吓人馬可唔可以做齣好戲。