希斯+潘頓贏馬保證 除咗高昇仲有天星

潘頓開季至今暫以8W領先騎師榜，9.6開鑼日為希斯鎮倉寶「嘉應高昇」贏得三級賽特首盃，直至今周三(9.23)谷草賽事二人再合作，分別是第一場「東方魅影」及第七場「天星」，後駒上季10月由潘頓贏馬，之前一仗由希威森跑田草得第五，今季初出配艾道拿亦係跑田草，結果後上追得第六，開氣後狀態有所提升，今次田轉谷兼潘頓騎番，複製番上季贏馬方程式。

「東方魅影」來港三季未嚐勝果，潘頓上季五度夥拍此駒上陣，有三次跑到第二，包括最後一仗短頭飲恨輸畀「手到再來」，今季初出在班德禮胯下殺入三甲，周三帥權再落入潘頓手中，睇得出騎者好想幫呢匹馬贏番場，值得一提此駒已退役同主馬「東方飛影」，七場勝仗全數由潘頓經手，可見他騎親「東方」系馬特別落力。