操足水中步行機再「豐」王

徐雨石在九月取得兩W，因為今季有從化倉，所以部份馬匹北上操練，今季不少徐廐馬曾用水中步行機做工夫，雖然至今八匹出賽馬最叻只得「鑽石星空」跑第四，但此駒隔周已經補中，可見水中步行機對馬匹有所幫助，今期徐廐有六駒出賽，其中尾場「豐辰」上季出賽16次獲四冠一亞四季，是上季徐廐代表作，今個暑假上從化操練，7月19日開始用水中步行機復課，回港前共使用過17次，在從化做過兩課閘才回港操練，改配田泰安亦合發揮，有力延續好表現。
第五場「越駿聯歡」上季尾初跑四班一哩，在巴度胯下追入第三，不敵放頭馬「暴風之子」，而該役賽前只用兩課跑步機做操練，在暑假初期操水中步行機，八月才開始出圈踱步，工夫循序漸進，其後亦不時用跑步機及水中步行機做工夫，回港後亦操過一課跑步機，賽前兩課試閘兜大彎試馬，四歲馬正值升軌，操足而來可打開勝門。