同心同樂泥閘有追勢

上周日沙田日賽取消令泥地賽事延至今日才首次舉行，三場泥地賽有不少馬匹初次轉場，第五場「怡傲錢莊」外地賽績來看只贏過兩場1000米，來港後五次1050米泥閘均入三甲，而且用不同跑法出試，上季5月14日泥閘放頭跑輕勝「頑童」及「馬力」，6月11日留後跑追入第三，最近9月15日泥閘留守包廂位，直路移出話過就過輕鬆贏閘，已經證明泥地性能出色。「怡傲錢莊」上季尾谷草1200米後上仄準路程性能，今次落班轉場即強配潘頓，出頭在望。

第七場有一半馬初跑泥地，雖然計泥閘成績以「十二神將」最準，但三班屬於下風，加上曾流鼻血機會睇淡。反而「同心同樂」要留意，試過12次獲兩冠三亞兩季，去年10月9日試1200米泥閘早段走四叠上前放頭，轉彎走二叠放甩對手贏閘，血統上同母馬Colizeo曾於泥地六捷，證明泥地性能不俗，最近9月15日泥閘雖然輸畀「丞匡掠影」五個馬位，但末段力騎仍有追勢，今次轉跑泥地可取得突破。

第一場「大浪園田」雖然三次泥閘皆敗北，但已經是去年在港初出前的時候，其中2月4日泥閘輸給「笑傲江湖」及「昇瀧駒」得第四，查「大浪園田」家族成員、前澳門馬「拍檔勁驅」在澳門贏沙地，轉跑泥地望有進步演出。