喜慶寶牙骹戰 一字記之曰超

袁幸堯上期尾場跑「友瑩仁」氣走潘頓「綫路英雄」，擸埋騎師王，呢位龍年出生嘅女將升呢減七磅，依然威力十足，愈來愈多馬主跟紅頂白搵佢，唔怪得今期「友瑩亮」馬主唔使考慮，一於卜袁來跑。
10.1賽馬，戊申日五行格局顯示，戊土坐申金，玄大師拆解，宜加持水、金平衡氣場，屬水之黑、藍色是旺財首選，次為金、銀、白色。旺門生肖有猴、鼠、龍。瑞郎哥話第六場佢正好要吼肖龍騎師兼有金、水加持馬，分别係梁家俊「佰勝金龍」同周俊樂「浪漫老撾」。冷門要防備肖鼠沈集成「電路一百」。
講開沈廐，今期牌面唔弱，五行亦利佢，除咗第二場贏完馬嘅「志醒大將」，仲有五場「升升雙息」同尾場「勇者為皇」都有料到。「升升雙息」襯晒金同水，而後駒係轉倉馬等補中，潘頓唔放手必有揸拿。
大師話「金」字馬之中，佢特別留意十場「金錢遊戲」，一來今日利肖猴廖康銘，二來隻馬上賽末段塞車，好似遊戲一場咁款。
塔羅小姐抽三張牌占卜，依次係「寶劍十」、「權杖二」同「錢幣五」逆位。首張牌意思可解作「衰無可衰，反彈可期」。咁頭幾場馬之中，有乜馬之前表現特別衰，現在來個大反彈？唔通講嘅係「同有運」繼續反彈？
小仙女依權杖二得靈感係「超」，今期好多「超」字馬，尾三場特别吸引，佢尤其鍾意十場「超寫意」，未有千四賽績支持，賠率一定好。
瑞郎哥向住小仙女「買魚搭個嘴」，佢話九場「超輕鬆」都好，不過要過到「喜慶寶」呢關先！我吋佢牙擦擦，實贏嘅咩。