陰陽五行利「好」！兔女攻勢如潮

馬王在澳洲衛冕失敗，瑞郎哥話唔夠運，玄大師唔同意，佢話有運唔代表實贏。「嘉應」系馬今季整體手風尚順，但「嘉應高昇」敗在未及巔峰，從另一角度睇，如果真係失運，可能連條Q都保唔住。中Q嘅朋友反而大呼好彩。
周三戊辰日，是為「破日」，玄大師話係「土生金」之局，旺門生肖有雞、猴、鼠，而羊、兔係兩路奇兵！肖雞姚本輝近期旺極，上期夜馬仲冧庄練馬師王，呢期「明德輝煌」熱都照拼，問題係「樂勝天下」跑一千咁短，擺明挑戰高難度。瑞郎哥話咁至好賠率呀！
肖鼠鍾易禮再跑「佐治傳奇」，成第五場當然爭勝主角，但大師話肖鼠仲有徐雨石，呢場佢有「鋼鐵安防」再用兔女黃寶妮，旺氣唔輸畀東、鍾組合。接下來八場「飛馬座」亦係徐廐重要目標。
肖羊方嘉柏谷戰例惡，瑞郎哥收到料佢多路出擊，頭場「勝利君子」上仗已經有腥氣，呢回增程會再追近啲！重要目標係七場「再世赤兔」同九場「哥倫布」。既然係旺「兔」之夜，方、拿又同屬肖羊，我少林仁一於跟風。
塔羅小姐抽三張牌占卜，依序係「戰車」正位、「命運之輪」逆位，以及「星幣騎士」正位。頭牌代表速度、控制、意志力，佢解讀為頭場先吼雙「子」，非「君子」即「太子」。
二牌呈逆位，代表時機不穩，三牌相反，在正位，代表穩健有耐力，兩牌結合可解讀為陰陽循環生生不息，小仙女靈感一閃：既有「子」，必有「女」，加埋就係「好」！
第六場有「好好戀愛」同「好評如潮」，小仙女話後駒配兔女，可睇高啲！尾場嘅「好」字馬有「一生好彩」，冷冷哋搭埋隻「兔」就和味咯。