五行利風雷 仙童踏火輪

冇幾可見潘頓停賽，玄大師話本來呢期唔係咁利佢，哈，又畀佢避開咗！周三係乙亥日，大師話五行格局係「水生木」，屬水之黑色藍色最旺，屬木之綠色亦有助財運。
大師靈機一「篤」，話第四場要一齊傾吓，牌面當然先睇「風起雲湧」之「湧」，但另一「風」更值得小心，係「步風雷」(圖)。
「雷」字屬水，而在周易卦象之中，「震卦」代表雷，屬性係木，換句話講，一個「雷」字有齊水、木加持，計五行在呢次夜賽有利，加埋同主馬「步風影」兩W，帶啲旺氣過來，「步風雷」把握得好可出冷門。是場QT，希斯一對要「準希望」？廖記雙寶要「智多多寶」？
講到生肖，虎兔旺，豬鼠強。老虎希斯除咗第四場出兩駒，八場「致力之城」又樹大招風，上回1.4倍輸馬，今回報仇？瑞郎哥話冇肉食；想搵隻好分嘅，佢都有隻「風」，係六場「孤風潛影」，潘明輝要爭氣，否則策騎權又畀洋將搶走。
肖兔有黃寶妮同甘敏斯。前者趕開齋，「一鹿歡騰」係告東尼明益佢，可惜難逃公眾熱門命運，睇吓搶閘醒唔醒啦。
肖豬嘅伍鵬志仲帶緊頭，季初旺門也，第四場佢有「精明選擇」、「步風雷」雙龍出海，大師已經講咗。接住五場亦係佢目標，「應龍飛影」用番艾兆禮，明砌啦，最緊要瑞郎哥補充一句：有料到！
塔羅小姐抽三張牌占卜，依次「寶劍騎士」正位、「星幣八」正位及「月亮」正位。頭牌寓意快、準、狠 。一見個狠字，就諗起「劍無情」，呢隻馬能助艾爭騎師王？
二牌講實力，三牌呈虚幻，一實一虚，格局係連場反覆，有熱膽必有冷腳。虚幻為小仙女帶來嘅靈感係尾場「風火輪」，此馬同「哪吒」上季同日响泥地開齋，巧合得如有神助！正如《封神演義》中 ，哪吒有風火輪呢件法寶，戰鬥力特強，今回兩駒同場又跑泥地，隨時再譜神話。