塔羅點選領袖 睿智制勝千里

美國議息在即，大戶當然緊張，瑞郎哥唱反調，佢話周四凌晨才公佈加唔加息，震盪一輪之後，市場又會搵藉口，例如話市場明朗咗，抖一抖又再炒賣；反觀周三賽馬在前，先睇是晚財路更加實際！
呢期夜馬係癸巳日，五行顯示水氣甚盛，玄大師話「土剋水」，加持土、火有助財運，選色宜偏重黃啡，次旺為紅紫橙色。
我少林仁一睇，四場「日馳千里」字面有土加持，袁幸堯更係多土到不得了；同場「烈焰光芒」則夠火猛，我問邊隻好？大師話論生肖以猴、雞、牛較旺，而姚本輝正屬肖雞，「輝」字正好有火，所以求賠率可博「日馳千里」。
瑞郎哥話肖猴練馬師廖、東都有料到，前者「穿甲」系兩駒出擊都會有好分頭。「穿甲戰鷹」在四班跑高啲；「穿甲金鷹」當起，臨場執生，飛到就馬到。
塔羅小姐上期唔怕「實力股」，大膽叫買「星運傳奇」，中到七彩，呢次佢又抽三張牌，出奇相同，但係次序有變：寶劍騎士、星幣四及命運之輪，預示當晚兵荒馬亂，投注策略係「贏谷輸縮」。
寶劍騎士呢張牌，上期對照咗「文武全能」，塔羅小姐今期靈感係有智有勇嘅領袖，即係五場「領袖勁力」及六場「智勇名駒」。佢補充，「領袖」配得上瑞郎哥來料嗰隻「戰鷹」啦。
最後兩張牌如何解讀？美女嘆住紅酒，話選取尾場「睿盛人生」，「睿」係睿智，「盛」對應星幣，「人生」對應命運之輪，鞍上人奧爾民肖牛，論五行亦對得上，隨時帶來驚喜。