驕陽×星玥 國心+紫荆

中美元首見面前夕，人民幣逐步升值，在戰略上一定程度釋出誠意同善意。講到戰略同誠意，黑夜之神方嘉柏果然谷戰特強，以為佢上屆奪冠，啲馬跑盡晒，哈，來到今季又有得贏，瑞郎哥話最誇張係上期尾場「睿盛人生」雖第二，但同場W係何澤堯，T係黃智弘，變相係方家軍三重彩。
今期谷戰為庚子日，五行術數有乜啟示？玄大師話是晚金氣盛，按「土生金、金生水」之格局，加持土、水平衡氣場，趨旺生財，屬土之黃、啡色旺你，而屬水之黑、藍色亦佳，留意吓方、廖、希、東佢哋打乜顏色領呔入場！
生肖以牛、猴、龍較旺。小龍女袁幸堯又有大餐士，除咗「土」旺佢，今回徐雨石抄功課，既然「鑽石星空」配袁成功補中，「電訊驕陽」照用呢招，合情合理。
瑞郎哥話捧完堯妹捧堯哥。方廐大攻勢之中，六場「福進」明醒何澤堯添食；另外有兩匹搵霍宏聲放冷箭，有五場「赤風驪」同九場「平凡騎士」。
大師話最好希斯打條藍或黃領呔入場，旺一旺佢件「天星」同「中國心」，後駒配肖龍楊明綸，必求開齋，尾場認住呢隻白衫黑袖！
塔羅小姐抽三張牌，分别係「寶劍五」、「星幣七」同「月亮」。預示頭中段多風險，以「大團圓」收尾。
美女反問我少林仁，誰先拔劍？戰士定勇士？我未睇得掂，佢已經話加埋另兩張牌顯示有星有月，靈感係第三場「星」+「玥」，第四場「千帥」拔劍。
尾場大團圓？如果大師睇好之「中國心」順利跑出，塔羅小姐話有埋「紫荊傳令」包Q嘅話，咁就絕配！